Unter dea Rubrik mecht i eich gern meine Familie und meine Freind ausm Ösilond vorstellen. Deswegn  schreib i a auf der Seite mit Tiroler Dialekt, damits amol lesn kennst wia i eigentlich red. Schreib dem mia Tiroler normalerweis a so wia in Deitschlond, owa monchmol schreib i holt aus Gaudi a so.

Also i fong amol mit meine Eltern on: mei Mama, Martha Flöck, isch am 2.5.1947 in da Steiermark geboren. Sie isch die beschte Mama de es gibt und nu dazu die beschte Köchin. Wenn ma auf Skiurlaub in Schwoz sen verwöhnt sie uns natürlich immer und loßts uns an nix faln. Mei Papa, Armin Flöck, isch am 29.9.1947 in Schwoz geboren. Er isch natürlich a da beschte Papa dens gibt. Mit eam ku ma viel lochn und ratschn. Wenn ma bei eana sen gibs ollaweil an guatn Kaffee, der schmeckt ma mit meim Paps natürlich glei nu so guat. An Bärli dafr i natürlich a nit vergessen. Er freit sich immer besonders aufn Andreas (er isch allergisch). Bärli isch da Liebling vo meine Eltern und darf natürlich ois und wehe er isch amol kronk:-) Er isch schoa wos besonderes.

Als nächstes kemmen meine zwoa besonderen Schätze, nämlich da Kilian und die Felicia. Des sen die Kinder vo meim Bruada Mario und meina Schwägerin Kathrin. Se sen zwoa echte Goldschatzln und jedesmol wenn ma zu Besuch sen, zerreißts ma fost es Herz, wenn ma wieder weg miaßn. Leider sech ma ins meist lei oamol im Johr, weil die Entfernung oafoch so groß isch. Owa wenn se a bissl greßa sen, nochand gehts vielleicht besser. Am lieabschten dat ma se immer mit nehmen, owa da Mario und die Kathi gebn se oafoch nit her, gemein, oder?

Damit kemmen ma zu meim Bruderherz, Mario Flöck. Da Mario isch a waschechta Tiroler, wohnt owa mit seina kloan Familie in Wiener Neustadt, da Heimat von da Kathrin. Mit eana zom wohnen da Sammy und da Tiger zwoa super Wochhunde. Se passn vorollem aufn Kili und auf die Feli auf. Mia versuchen uns mindestens oamol im Johr zu treffen, wos eigentlich zuwenig isch, owa leider hauts meistens nit öfter hin, deswegn telefonier ma öfters und ratschn über ols mögliche. Die Kathrin steckt mitten in den Abschlußorbeiten für ihr Studium. Trotz oller Orbeit und Lernerei hom Mario und Kathrin die zwoa Kinder super erzogen und  mochn viel mit eana. 

Nochand kemmen ma zu meiner Schwester und ihrer Familie. Die Doris isch mei kloane Schwester, sog i ollaweil, owa lei weil sie so a letza Gregn isch sinscht is sie älter wia i und a wia da Mario.  Die Doris singt am Landestheater in Innsbruck. Sie hot schoa zwoa ziemlich große Madln, die Julia und die Lisa. Und nochand gibs do nu seit November 2004 an Emanuel, also an kloan Nochzügler. Owa des isch eh gonz guat fürn Papa Christoph, weil mit drei Weiberleit dahoam hot ers eh nit immer leicht, also hot er iatz Verstärkung kriag.  Vielleicht kemmen se ins a amol in Duisburg besuchen, oder oans von die Madln taucht amol bei ins auf. Sinscht sech ma olle zom a meist lei oamol im Johr, weil die Entfernung jo a so weit isch. Die Doris wohnt mit ihrer Familie in Innsbruck, des isch die Landeshauptstadt von Tirol. Die Lisa isch a super guate Sprtlerin und hot schoa einiges gwonnen und die Julia rüstet sich schon für ihr Berufsleben und schaug schoa amol wos sie mochn werd, da sie super mit Kinder umgehn konn, werd sie wohl amol wos in der Richtung mochn.

Damit war die Familie in Österreich soweit ogschlossn. Natürlich gibs do nu a poor Onkl und Tantn, Cousins und Cousinen de owa olle zu beschreibn, do werad i nie mehr fertig.

Wen i natürlich nit vergessen mecht, sen Moni und Günther und die Lena. Die Moni kenn i schoa seit ca. 17 Johr und sie isch a wenn sie so weitt weg isch, mei beste Freindin. Sie wor und isch immer für mi do und obwohl ma ins lei oamol im Johr sechn, hot insa Freindschoft immer nu Bestand. Mia hom so viel lässige Sochn miteinonder erlebt und es isch ollaweil super wenn ma in Schwoz sen und mia se besuchn. Donn werd genau so viel Bledsinn gmocht und glocht wia früher, super, daß des a so bliebn isch. Es gleiche gilt fürn Günther, de zwoa sen oafoch so feine Leit auf de ma sich 1000% verlossn ku. Die Lena isch mittlerweile schoa in da zwoatn Klass, des geht so schnell dahin. Des Johr, wenn ols paßt schaugs wohl so aus, als wenn se als erste mol noch Duisburg auf Besuch kemmen datn. Do frein ma ins schoa drauf. Nochand ku i eane endlich amol mei neue Heimat zoagn.

Als Abschluß mecht i eich nu an Erwin und die Sieglinde Kirchler vorstellen. De zwoa sen schoa ewig long mit meine Eltern befreundet und wenn mia in Schwoz sen nochand gen ma immer wieder gern auf Besuch, weils oafoch so nett isch bei de zwoa. Nochand ratsch ma ollaweil über früher oder schaugn ins Bilder u, wo ma olle miteinander bei meine Großeltern in da Steiermark auf Urlaub worn. Des sen total super Erinnerungen an lässige Urlaube. Leider hots nu nit hinghuat, daß se ins amol besuchen, owa vielleicht kloppts jo amol. Also mit die Kirchler ku ma echt so a Hetz und a Gaudi hom, des isch a Wahn, i muaß immer nu lochn wenn i an die Hochzeit von Mario und Kathrin denk, wos ma do glocht hom mit die Kirchler. Und jedes mol wenn ma ins treffn redn ma do drüber und lochn wieder. Es mocht oafoch Spaß.

So jetzt hobs a bissl an Überblick über die Ösifraktion. Da Schwoz jo kloa isch, hihi sens holt nit so viele......owa für mi as Wichtigste an Österreich!